Van KUL pès KULTUUR - D'n eesjte van de teende jaorgank

Van KUL pès KULTUUR, ein sjtökske Zittesj van John Hertogh veur uch - Jaorgank 10 nómmer 1 - 11 januari 2025.

Jao, geer laes ’t goud. De teende jaorgank alweier van dit (ón-)reigelmaotig versjie-nend sjtökske Zittesj van mich veur uch. Waal in ein anger lettertiep en mit eine angere kop d’r baove. Me zaet dat ich oppe foto kontent kiek en dat bèn ich ouch, meistes teminste. Ich zal in jeder geval perbeiere óm zo positief muigelik te blieve sjrieve dit jaor. ’t Eesjte sjtök van miene maonjelikse rubriek Ós Modesjtaal haet dees waek ouch al in de VIA van De Limburger gesjtange. Laesvouwer zat dus.

De krisboum en krissjtal zeen intösje opgeruump. De vakantie is veurbie en ‘t ‘geweune’ laeve geit door. Väöl veurnummesj höb ich neit gemaak en achteroet kieke doon ich neit gaer, want de kans óm te sjtrukele wil ich zo klein muigelik make.

Op nao de vastelaovend. Op nao de zölder, dae lik naeve de krissjpulle alle vastelaoveskraom. Kleier, posters, slingesj, confetti, kammezäölkes, jes, huidjes, zelfs aw munte en bónne! Sjoon herinneringe, van mit ’t ganse gezin mitloupe in d’n optoch van Houtem pès door raege en sjnee mit fanfaar St.-Jan op de vastelaoveszóndig in Zitterd. Op de zölder vónj ich ouch alle prechtige Greutsje Pinne trök, sjoon naevenein op mien favoriete huitje gesjtaoke. Euveriges jaomer dat Marc daomit gesjtop is, neit dan? Wie ich bie ’t Kallebeske vroug nao de pin van de Sjpasvogel, waar dae nog neit geleverd. Woróm?? Laote veer ’t op ein kènjerkrankheid hawte. Mer ein dènk is zeker: De veugel op de greutsje pinne ware en zeen sowieso uniek en neit te euvertreffe, dènk ich. Mer veurdat ich doorsjrief euver de (Vastelaovend) kultuur eesj nog get anger zake:

Op miene zölder zoug ich ouch ein buikske oet 1974 ligke mit sjoon (aw) Limburgse we urd die gebroek woorte in eine ‘dialekkwis’ georganiseierd door de R.O.Z. (Regionale Omroep Zuid) en Veldeke. Ich kèn ’t neit laote óm die veur uch op te sjrieve. Hie kómme d’r ein sjtèl: ‘ne pinteneuker (in ‘t Zittesj pintenäökert) is emes dae nej (gierig) is. Paul Prikken haet ’t euver eine krietsjieter of knaokepeer. Waat jesjeer is wit geer natuurlik (gereidsjap) en waat zou dan in Kirchrao naats-jesjier zeen? In ’t Holles zègke ze po, hie zaet me pispot (-pötje). Nog ein woord oet die sjtreek: Herrejodswinkmècher, dat is namelik eine organis. Sjoon hè. Es de hóndj kump baedele veur aete is dat eine grantjerd. Eine gaodsklöppel haet niks mit God te make, mer is eine sjtómmerik of ‘ne ónhenjige. Ein sjtriekreur is ein aafsjoemletje veur ’t beier. Pès zo wied get (aw) Limburgse weurd. Ich haop neit dat geer kreuspelik (pritsj) zeet gewore van dit sjtökske! 

Pès de volgende van KUL pès KULTUUR, reacties: [email protected].