Van KUL pès KULTUUR - Naogeneite

Zo, ouch al is 't alweier ruum veurbie, ich bèn nog aan 't naogeneite van de veierde editie van Zitterd Sjittert in de Vief Heringe.

Dat waar pas reklaam veur Zitterd. Waat ein sjtömming, waat ein gevarieierd pregram, waat ein keur aan (groot-)Zittesje artiste. Ich gaon ze neit allenej apaart opnuime, behawve miene perseunlikke faveriet: Skinnie oftewaal Ron van der Burgt. Waat 'n sjtöm, waat eine sfeer, houndervel. Es de viefde editie, 't eesjte lustrum, in 2026 doorgeit, haop ich dat hae zeker d'r bie is, sjus wie 't combo van dit jaor, oetgebreid dan mit beveurbeeld get muzikante van Baroesjko e.n.m.e.n.m.e.n.v.m.! En Louis Vahsen, Laammaeker van 't jaor 2025, perfisiat. Maurice, Mitchell en Rob: gank zo door!

Oetgerös

Intösje zeen veier weier ein waekske nao óze oetrösplek in de Eifel gewaes óm bie te tenke. Nae geine benzien, dae is op vandaag d'n daag dao ouch al neit mee billiger es bie ós. 't Waar dao euveriges sjus zó'n lekker waer es hiej, zouge veer oppe 'waer-epp'. Jederen daag ein sjtök geloupe, väöl gezèllige luuj taegegekómme en natuurlik – wie ummer dao – lekker gegaete, gedrónke, gelaeze en goud gesjlaope. De Eifel wurt gelökkig weier ei bietsjke toeristischer, geluif ich. Dat höbbe ze zeker neudig. Waat mich waal get sjteurt is dat enorme laweit van al die motore die dao róndj rieje. D'r zeen al dörper wo ze neit mee mage kómme in 't wiekend en op feesdage. Dat kèn ich urges waal begriepe. Mer jeder zienen hobby… En dan kumps te thoes, wo 'ne houp gezètte op dich wachte, mit 'ne houp nuuts en mit 'ne nog grotere houp elenj d'rin. Es me dat lees is me bekans weier aan vakans toe!

Nuuts

Fortuna blif in de eredivisie, mer zal gein 'Europees' voetbal sjpele omdat ze gein op tied ein UEFA-licentie höbbe kènne aanvraoge. Jaomer, toch? Jaomer ouch dat Zitterd-Gelaen.nuuts.nl van Hub Hamers in de 'vekans-sjtandj' sjteit. Bekans 14 jaor höbbe veer allenej 't nuuts van häöm kènne volge. Ouch ich dank Hub dat 'r mien sjtökker troew haet geplaatsj.

Tensjlotte: Ich wil jederein dae op Feesbouk en op anger maneiere positief haet gereageierd op 't berich euver 't neit mee plaatsje van de maonjelikse rubriek Ós Modesjtaal in de VIA van de gezèt, bedanke veur hun sjteun en vertroewe. Geer kènt mich: ich blief sjrieve in 't Zittesj. Blif geer 't laeze? Pès de volgende van KUL pès KULTUUR mdk John