Van KUL pès KULTUUR, ein sjtökske Zittesj van John Hertogh veur uch – Jaorgank 9 nómmer 12 – 19 juni 2024.
Veer zeen al wied op waeg in juni, väöl luuj kriege al vakanskriebels. Verkans, vekans, vakans, vakanse, verkanse en in ’t Belsj höbbe ze ’t euver verlof. Wo gaot geer haer? Veer gaon ein waek nao ’t boetelandj en in die gaengend dao sjpraeke ze weier gans anger dialek: Trierisch. Ich mein dat ze ’t Moselfränkisch nuime. Ein paar weurd deige mich toch aan ‘t Zittesj dènke:’n pärd is ein paerd, ein räjenschörm is ein perpluuj, ein kuhflatsch is ein flat van ein kou, eine deiwel is eine duvel en ‘ne dinnschissbraddler is emes dae dómme kal d’roet sjleit! Prechtig, toch?!
Mer laote veer ’t mer op richtig Zittesj hawte. Sjiek hè, dat Sjef Schurgers de Toon Hermanspries haet gekrege. Es eme ’t verdeind haet, dan is ’t Sjef waal. Eine dikke perficiat, ouch van mich.
Veer kènne dees daag blieve feliciteiere: alle sjoliere en sjtudente die gesjlaag zeen veur hun exames: ouch veur uch van harte gefeliciteierd. En degein die nog her-exames höbbe, of ’t noe neit gehaold höbbe, volgende keer mee sukses.
Trouwes, zeen alle vadesj ónger de laezesj ouch goud bedach mit vaderdaag?
Waat mich nog van ’t hart mót: ik sjrik ummer van die berichte euver klöp-pertieje en ruzinge op sjole, wobie zelfs de awwesj zich gaon muije en wo metser waere gebroek of berichte euver aafgeblaoze gala- en anger feeste, wo me zich neit haet kènne gedrage! De gezèt sjteit ‘r vol van. Ouch die misdraginge in trein en bös of taege hulpverlenesj kèn ich neit begriepe. Ich zou zègke: gedraag uch!
Intösje is ’t Europees voetbaltournooi ouch van sjtart gegange. Op ’t momènt dat ich dit sjrief haet Oranje de eesjte wedsjtried gewónne van Pole. Verwach van mich gein oetgebreid versjlaag, want z’ónne grote voetballeifhöbber bèn ich noe ouch weier neit. Jao, de matches van ós eige landj wil ich waal volge en waat daonao kump, ich zeen waal.
Ich gaon aafsjloete mit ein positief berich dat kómmende zóndig van12:00 pès 17:00 oer weier ’t Geheime Tuinen Festival wurt gehawte. Mit meziek, dans, gedichter, wanjelinge, ‘workshops’ en eine gruine informatiemert.’t Is al de teen-de editie. Ich bèn d’r dits keer neit bie mit mien gedichter, mer gaon waal loestere nao mien favoriete band: Baroesjko! Mesjiens zeen veer ós dao.
Pès de volgende van KUL pès KULTUUR, euver twee of drie waeke. Mit de kómplimènte, John.
Reageiere: [email protected].
