Aoh, lekker! Gank oet de waeg, ich mót nao Zitterd!

De frisj verkaoze Miss Tattoo Benelux 2023 Dazzle Dawn Drost, dat is euveriges häör echte naam, maakde aafgeloupe waek ein sjmaaksensatie mit!

Dazzle Dawn - vrie vertaald verblènjend mörgesglore - pruifde namelik in Almere, wo zie woont, veur 't eesj in häör laeve van ein richtige Zittesje nónnevot.

De reactie dao-op wille veer uch neit onthawte, en klonk sjus wie Thei Hunnekens zeliger ummer zong: "Gank oet de waeg, ich mót nao Zitterd!".

Ze is bie deze den ouch van harte geneud óm Vastelaoveszóndig èns nao de Grote Optoch in 't sjtedje van lol en sjpas te kómme kieke! Mer of 't kump?

Wie dan ouch, Radio Nónnevot kenne ze noe ouch in Almere en de provinsjaal vastelaovesposter van Frank Wagtmans hingk inmiddels ouch al in Almere!