De lente, de lente, wo ich mich zo op sjpich...

Jeder jaor opnuuj dat wónjer... en dan dènk me aan sjneeklökskes, krokusse, Weieblömkes… aan sjoner en wermer daag, aan – eindelik! – weier ’n terrasje.

Mer ’t waer is nogal “wisselvallig” wie me zo zaet of angesj gezag: ’t wit niet waat ’t wilt...

Dat mirks te mer al te goud: zo sjient de zón, zo begint ’t te raegene of zelfs te sjnieje! Nachvors is nog gans normaal in dezen tied van ’t jaor. Die kans blif nog pès de drie iesheilige in mei, wie me zaet.

Sjpraekweurd euver de lente laote ós ouch gaaroets geine twiefel euver waat ós nog dèkser te wachte sjteit. ’n Paar veurbeelde: meert ruiert ziene sjtart; april deit waat ‘r wilt; mei kawd en naat, völt de sjuur en ouch ’t vaat...

Jao, dan is me richtig blie dat ’t Paosje wurt: dat is toch ’t richtige lentefees. Mer neit altied es veer ’n sjpraekwoord mage geluive: vleige mit Krismis de mögke róndj, dan lik mit Paosje ies oppe gróndj! Mit de aafgeloupe Krismis waar ’t erg zach waer...

Mer óndanks alle “elenj” van sjnee en ozelig waer zèt ’t nuut laeve zich toch door! ’t Haet óngedöldig de ganse wèntjer door mótte wachte. En noe is ’t zo wied: de tulpkes kómmen oet de gróndj en de narcisse en weit ich veur waat veur bloume. De knup in de buim en sjtruuk waere langzaam aan dikker en dikker. Inèns sjprink ’t blaedje d’roet. Nog get verlaege en ónzeker, nog graasgruin kik ’t in dae nuje ónbekende welt. ’t Is zeker van plan ’n richtig volwasse blaad te waere. Daoveur haet ’t dan ouch de ganse zomer pès aan de herfs d’n tied …

’t Haet langer gedoerd es gedach mit dit sjlech waer, mer inens is ’t esof d’r ’n wónjer gebeurt: ’t is richtig sprèng-tied! ’t Jónk laeve barsj in volle krach oet en in gans korten tied is de ganse natuur verangerd. ’t Is sjus of de lóch ouch angesj ruuk, frisjer. Lente-frisj. Jao, en kiek mer èns nao boete, kiek nao de veugelkes die ónröstig beginne te waere. En dat klein bieke dao op die bloum: ’t wrif zich de peutjes. Van plezeier ómdat ’t nuuj en frisje bloume zuut óf is ’t toch nog vanwaege de kaw?

De lente kump mit valle en opsjtaon, mer “mit vlagge en mit trómme zulle veer te wachte sjtaon”, zóng Jochem.

Mer ein dènk is zeker: óndanks ’t nog dèks sjlech waer in de lente, de zomer 2023 kump vas en zeker…