Eine oproup van Veldgewas aan de sjrievesj en dichtesj ónger ós

De redactie van 't online magazine Veldgewas op de website van Veldeke Limburg deit eine oproup aan de sjrievesj en dichtesj ónger ós.

De redactie neujt jederein, dae in de Limburgse taal sjrif of wilt lere sjrieve, oet óm gedichter en korte verhaole op te sjikke nao [email protected] .

De redactie zal alles waat geer insjik mit plezeier bekieke en beoordeile of 't gesjik is veur publicatie in 't online magazine. Es criteria gelje daobie veural: oorsjprónkelikheid, creatief taalgebroek en belaeving. Es geer dao pries op sjtèlt wille veer uch gaer advies gaeve euver wie 'nen teks eventueel verbaeterd kènt waere. Mer of geer uch dao get van aantrèk maag geer gans zelf weite.

Geer houf ouch neit bang te zien dat de redactie al te kritisch is op de sjpelling van de Limburgse taal. Me wil uch gaer informeiere euver de veurkeursjpelling dae Veldeke al in 2002 haet opgesjtèld. Mer es geer gouw raejes höb óm op eur eige maneier te sjpelle, is dat ouch goud. 't Belangriekste is dat in de Limburgse taal gesjreve wurt.

En dènk noe neit te gaw: dat is niks veur mich. Veer meine te weite dat väöl luuj in Limburg gedichter en verhaole wille sjrieve, ouch dèks in de taal van hun sjtad of dörp. Mer neit jederein haet de moud óm die te publiceiere. De redactie van Veldgewas wil uch ein leegdörpelig podium beije óm dao 'ne kómaaf aan te make.

Perbeier 't èns, geer maag sowieso altied 'n reactie van de redactie verwachte. En es geer verlaege zit óm insjpiratie: kiek in in ’t archief nao waat Veldgewas in de aofgeloupe 12 jaor zo-al gepubliceierd haet.

"Veer zeen eur gedichter en verhaole gaer kómme!" zo zaet de redactie van Veldgewas; Wim Kuipers, Har Sniekers, Wim Kallen en Bèr Brounts.