Gruin Buikske van 't Zittesj te koup mit Sint Joep

Nog mer 'n paar daag te gaon en dan is 't weier zo wied: ein van de jaorlikse hoogtepunte in ós Zittert. Ein maol in 't jaor höbbe veer hie 'ne richtige jaormert: de Sint-Joepmert op 19 meert!

Teendoezende luuj van kort bie en wied aaf kómme dan nao ós sjtedje óm zich get te koupe, te kieke, te flaneiere enne… natuurlik ouch óm zich get te aete en te drènke! En dèks haet me zich get 'apaarts en nuuts' gekoch dat me later thoes (verrasjing!) gaaroets neit neudig bliek te höbbe! Wirkelik, 'ne richtige feesdaag!

Mer dit is ouch d'n daag dat aw Zitterder oet de vraemde ós sjtad nog weier opzuike óm mit bekènde van vruiger zich èns eine oppe lamp te sjödde en te klasjeneiere euver 'dae gouwe awwen tied'.

Tösje al die hónderde kräömkes die-s te zuus, is 'r ein plekske dat waal gans bizunjer is: 't Maria-park, sjus taegeneuver de Basiliek. 't Is 'n richtig röspunt in alle hectiek van daen daag. 't Geboew, 'n paar jaor gelee fantastisch gerestaureierd, sjtraolt es Zittesj blömke rös oet en neut oet óm bènne èns róndj te kieke. Me kènt 'r effe op aom kómme van alle gevraadsjel, me kènt 'r zich ouch get drènke en 'n sjtök kouk aete. Mer dao is meer te doon! In dat park sjtaon ouch gans get kräömkes mit veur daen daag sjpecifieke zake.

Dao ouch kènt me zich 't Gruin Buikske van 't Zittesj aansjaffe (vanaaf 8 oer 'sj mörges pès 5 oer 'sj middigs). Dees oetgaaf van de Willy Dols Sjtichting is 'ne sjpellinggids veur 't Zittesj en waal 'n 'up-to-date'-oetgaaf, zo wie me dat waal zaet. Veur väöl Zitterder is 't noe 't gelaeg zich dit bouk van bekans 280 pagina's te koupe. De eesjte oplaag waar namelik al nao twee waeke oetverkoch! En noe is 'r eine nuje aanvöllenden drök! Dus noe is de richtige kans dao óm van de Sint-Joepmert heivesj te gaon mit get gans bizunjers wo me zeker geine sjpiet van krig!

In gedachte zeen ich Sint-Jozef zelf, nao trökgekómme te zeen in den hemel van 'ziene' mert, greutsj wie eine paw mit 't Gruin Buikske róndjloupe óm jederein dao te laote zeen wie die Zitterder hun eige taal respecteiere en cultiveiere...

F.W. - meert 2016