Hein Bovendeaard euver ... En es 't Vastelaovend wurt... !

En es 't Vastelaovend wurt... !

Jao leif luuj oet 't Zittesj landj, veurige waek zóndigmiddig waar 't d'n 11de van de 11de en dus sjtóng de vasteleoves-trein op 't Marotteperron klaor veur vertrèk, klaor veur 'n nuut sezoen ónger 't motto "dao zeen meer gekke es me meint" (noe is dat ummer al zo, ouch zónger dat de vastelaovend oppe rol sjteit).

En noe mer aafwachte waat dat veur 'ne trein wurt want 't sezoen is waal erg kort dit vastelaovesjaor: al op zóndig 10 februari 2013 trèk de grote optoch door Zitterd en drie daag later is al weier alles veurbie.

Zóndig d'n 11de van de 11de waar 't in eder geval 'n boemeltreinke. De luuj mótte geluif ich nog wènne aan sjpas make op d'n 11de van de 11de, want väöl volk gouf 't neit. En de Marotte? Die ware allenej dao mer väöl anger mötsjedraegesj leite zich neit zeen (of waar 't neit belangrik genóg?).

Waal officieel ware de felicitaties veur grootvorst Fernao I dae intösje al 3 x 11 jaor lid is van de Marotte. Proficiat! Es hae zo blif doorgaon kènt hae ózze eige vorstin Beatrix nog inhaole en wae wèt ouch nog Elizabeth van Éngelandj, want frisj vleisj hiltj zich goud.

't Kèndj loug oppe zónnebank
't sjträölke sjeen get fel,
de wermte góng m door de prie
zie sjeen m door t vel,
en wie koum dat, ónneuzel sjaop ?

't veil al druimend deip in sjlaop.

Refrein:
Ich zjwaeaeaeaeaer 't dich
ich zjwaeaeaeaeaer 't dich
ich hawt allein van dich,
allein allein van dich
al wurs doe zo rood wie 'n kraef
ich hawt van dich, ich hawt van dich

ich hawt van dich zolang ich laef.

Lèts góng datzelfde kèndj
veur euros nao de bank,
mer waat 't dao te heure kreeg
maakde 'm ocherm zo krank
de baliekluiver zag doe sjteis in 't rood
ich maag dich gaar niks gaeve
't maedje sjaamde zich hardsjtikke dood

't gouf niks mee óm 't laeve.

Mer es me zich verkleie geit
dènk veural dan aan de sjmink
want frisj rood gael gruin,
dat is de kleur wo 't óm geit
mer sjoner nog ich zègk 't dich
dat is veur mich gein vraog
ich kiek 't leifste toch
nao dien eige kleur:

sjoon wie eine raegebaog!