Hein Bovendeaard euver ... Hotel Sint Joseph

Hotel Sint Joseph

De Zittesje óngernummer Ton Vandenbergh haet bekèndgemaak dat hae de vruigere radio-en televisiezaak van ziene pap, Dom Vandenbergh op d'n houk van de Riekswaeg Noord en de Veursjtad, weier geit inrichte es horecabedrief zo wie 't pes in de 20-er jaore furore maakde es Hotel Restaurant ANWB-Bondshotel Sint Joseph.

Of 't dae naam zal trökkriege, hink nog in wiej zek. Dat zou waal sjoon zeen en zéér chique klinke, want dae naam haet get. Me kènt zich aafvraoge wie dae naam is óntsjtange. Ein optie geef 't al want in 1907 woort aan de Parklaan door aannummer J. Laudy taege de pries van Fl. 79.975,00 't Bissjoppelik College geboewd dat de naam Sint Joseph góng heisje.

Wae wèt!

Hotel St. Joseph (Foto: bron onbekend)

D'n heer Vandenbergh wèt wie haas hup, dus dat kump waal goud. 't Jaor 1907 waar zo sjlech nog neit veur Zitterd; 't Vergrote Post- en Telegraafkantoor op d'n houk Begienenhofsjtraot/Brandjstraot woort ge-äöpend, dao góng veur 'n nuut sjlachhoes de eesjte sjöp de gróndj in,woort 't besjloet genómme óm 'n tweede legere sjool te boewe, de gaasfabrik woort oetgebreid en de Sjteivig kreeg nuuj besjtraoting. Ouch woort aan de Riekswaeg Zuid 't nuut geboew van de teikensjool in gebroek genómme en – ocherm - woort de Sjötterie van de kaart gevaeg. Zittesje opbboew in vogelvluch; zeker neit gek veur 'n sjtedje van róndj de 7.000 inwonesj.

Tössje Dómmenik en Schrage
Dao is 't laeve goud te drage
Jónges maedjes in de sjtraot
Loupe baenkes zuver in de maot
Tössje Dómmenik en Schrage
Ze vraoge neit of ze 't mage
Jónges maedjes op en aaf
Dat is Zitterd jao allein alaaf

En dit is dan 't refrein van 't leidje van Jochem dat veer decennia höbbe gezónge mit de vastelaovend: tösje Dómmenik (Vandenbergh) en de (potsjtouf) Schrage. En dat zou zo mer weier kènne es Vandenbergh zien aetcafé/restaurant geit äöpene. Veer laote ós verrasje, mer dat 'n horecazaak op die lokatie ein succes zal waere sjteit noe al zo vas es 'n hoes. En zal veur Zitterd gegarandeierd 'n aanwèns zeen. Gezóndjheid, ich krieg d'r doosj van ...

Hotel St. Joseph, parkeerplaats (Foto: bron onbekend)