Jao dan wurt 't Vastelaovend - Radio Nónnevot keert trök!

Vandaag woort oppe Mert in Zitterd ein filmke gesjaote veur Radio Nónnevot, dat geer oppe Elfde van de Elfde op social media kent bekieke.

Went oppen daag dat 't nuujt Vastelaovessezoen begint wurt Radio Nónnevot nao ein succesvol debuut van begin dit jaor opnuuts de ether ingesjlingerd.

De via internet te beloestere zenjer brink behawve prechtige aw Zittesje Vastelaovesleidjes ouch nuuj oetgebrachde nómmesj en geef de loesteraer eine sjone misjmasj van aw en nuuj plaetjes.

Mer dat is neit alles, went achter de sjirme wurt hel gewirk aan eine pódkas mit nuujts, interviews, de plaat en zien verhaol én priesvraoge wo-mit weier Zittesje nónnevotte gewónne kenne waere.

Kort gezag: Radio Nónnevot geit weier al d'raan doon óm de Zittesje Vastelaovesgekke alvas in de richtige sjtömming te brènge.

Nao dit goud nuuts res de vraog of d'r dits keer mit Vastelaovend ouch weier ein Top111 wurdt gepresenteierd. "Zo lang es 't coronavirus wie ein grimmig sjpook actief blif en teste veur toegank en 't coronatoeganksbewies neudig blieve zal 't gans lestig waere óm d'n optoch door de sjtraote van Zitterrd te laote trekke," zo verwachte de luuj van Radio Nónnevot. "Es dat zo moch zeen dan belaove veer dat op Vastelaoveszóndig 27 fibberwarie 2022 Radio Nónnevot mit ein programma kump en dao nog ein groter sjpektakel van te zulle make es begin dit jaor al 't geval waas. Ouch es d'n optoch kómmend jaor op 27 fibberwari waal trek - en dao haope veer natuurlik allenej op - leet Radio Nónnevot in 't sezoen van zich heure!"

Volg Radio Nónnevot op social media en de website: