Radio Nónnevot - oetsjlaag Zittesje Vastelaovestop 111

Ein zinderende finale van de TOP111..."Wae oh wae, zal ’t waere", góng gepaard mit de sjoonste podcasts van dit sezoen en sjtömme oet ’t ganse vereinigingslaeve!

De vastelaovend woort dit jaor in ein waek geduud, belaef en gevierd! In de opmarsj van dees daag haet Radio Nónnevot uch vanaaf de ellefde van de ellefde alle richtige Zittesje vastelaovesleidjes en ’t bèste oet Limburg laote heure.

Geer höb jeder waek raozende reporter Sam, de Plaat en zien Verhaol van René Haustermans en de sjtevige mixe van DJacky veurbie heure kómme. Daonaeve bie höb de Hittepetit en Tikkerke mitgesjpeeld. En d'r zeen gans väöl nónnevotte oetgedeild!

Terwiel in mènnig hoeskamer nog ideekes woorte bedach veur in de Grote Optoch dae in ein aangepasde route door Zitterd moch trèkke höb geer ouch alleney massaal eur sjtöm oppe TOP111 oetgebrach!

"Veer es Radio Nónnevot zeen hartsjtikke greutsj dat geer ’t gans sezoen nao Radio Nónnevot höb geloesterd, zellefs naeve de sjtraot vastelaovend dae veer goud höbbe maage viere!"

De sjtried óm de eretitel óm zich wènner van de TOP111 2022 te mage nuime waar forsj. ’t Góng kop aan kop tössje de nómmesj 1 pès en mit 3. De Nach van ’t Awt Wief zal de doorsjlaag höbbe gegaeve... wènt de wènner van de

TOP111 2022 is ’t Convent van Neit Prinse Zitterd mit de Neit Prinse Rèpzooidie.

Radio Nónnevot sjlut Essjelegounsdig aaf. Dan is alles weier veurbie!

Mer ein dènk is zeker: Radio Nónnevot blif naeve ooze prechtige Zittesje Vastelaovend besjtaon. Veer heure en zeen ós weier in 2023. Mit nog meer ideekes en gekke teun óm vanaaf de ellefde van de ellefde dat richtige vastelaovesgevuil bie uch de hoeskamer en de kefeekes in te sjlingere.