Van KUL pès KULTUUR - Ein euverzich

Van KUL pès KULTUUR, ein sjtökske Zittesj van John Hertogh veur uch - Jaorgank 9 nómmer 22 - 22 december 2024.

Zo wie zich dat heurt bie ’t lètste sjtökske van ’t jaor, krig geer ein euverzich van waat ich zoal biejein gesjreve höb. In de eesjtevan KUL pès KULTUUR van dit jaor haw ich ’t euver "kürzer treten" mer dat is t'r (nog) neit van gekómme. Daonao haw ich 't euver euver ónkontente inwonesj van ós sjoon sjtedje, euver de nuje sjtadsdichter en de get vraeme maneier van oetkeize, euver zich sjtechele bie 't LVK, euver Texel en euver miene viefde bundel: Eine poes bloume in 't Zittesj.

Ouch sjreef ich euver St. Joep en de St. Joepmert, euver opblaosbare krokodille, 't krombroodrape, de Eifel, 't protestantekirkef, euver moele-janusse en klasjeneiere, euver de väöle vriejen tied van sjoolmeistesj! Zitterd Sjittert en 't Parkfestival; euver amateurtoneel en pènks-pummele, euver Kaffeklatsj en geneite van de veugel in d'n haof, euver vakans, de Toon Hermans pries veur Sjef Schurgers, de Joodse gemeinsjap in Zitterd, 't sjlechte zomerwaer en de Rosa percessie.

Ich sjreef euver de baewaeg nao Kaevelaer en 't alternatief Sjöttefees, van super-opa en doeve, van de wèntjertied, 't Groot Zittesj Dictee en Hallo-wien, van de Sjpasvogel en de Marottewinkel cq 't Vastelaovesmuseum, euver blajer op sjtraot, naobersjap en nog mee en nog väöl mee óngerwerpe.

In jannewarie begint de teende jaorgank van mien sjtökskes Zittesj en ich haop dat geer die wilt blieve óntvange en laeze, eur meining wilt blieve gaeve en 't sjtök wilt blieve doorsjikke of wiejer vertèlle. En es geer zelf get óngerwerpe wilt aandrage… sjik mer op. Es geer d’r neit genóg van kènt kriege, op miene websait www.zittesj.jouwweb.nl kènt geer nog väöl mee vènje euver ós sjoon Zittesje taal.

Tensjlotte wil ich uch bedanke dat geer miene ‘KUL en KULTUUR’ höb wille laeze. Ich blief sjrieve… blif geer 't laeze????

Ich wunsj uch Sjoon Krisdaag en eine gouwe Roetsj nao 2025.

Pès de volgende van KUL pès KULTUUR

De eesjte van 2025 versjient hawf jannewarie, pès dan.

Gaer gedaon, reacties: [email protected].