Van KUL pès KULTUUR - Prins, Sinterklaos en Krismes

Van KUL pès KULTUUR, ein sjtökske Zittesj van John Hertogh veur uch - Jaorgank 9 nómmer 21 - 24 november 2024.

’t Geit weier hel: veer höbbe eine nuje prins: Wout d’n eesjte. Én eine nuje vastelaovessjlager van Luc, Nigel en Cyrille: Plök d’n daag. Gesjreve door Sjohn en Gian. En ‘t 13x11 jaorig jubilei-weekend van de Marotte is al veurbie. En Sinterklaos is al oet ’t landj en ouch oet Zitterd. Veer zitte al midde in d’n Advent, de veurbereiïng op de Krismes.

Es Sinterklaos trök nao Sjpanje is dan sjteit meistes de adventskrans al op taofel. Dan wurt d’r  ouch dèks eine advents-kalender opgehange. Dae haet dan veur jederen daag ein luukske, mit ein verrasjing. Be-veurbeeld eine babbelaer of ein sjtökske sjoklaat. Mer gister zoug ich ‘ne advents-kalender mit 24 flesjkes parfum.  ’t Mót neit gekker waere. 

Mer waat ein feeste allenej. Soms loupe die mich get doorein. Zo zoug ich eemes mit ein tuutje paeperneut ónger de sjoon krisverseiering veur de etalaasj van ’t nuuj Vastelaoavesgesjef sjtaon.

Waat michzelf betruf: saer dat gedouns mit die Zjwarte Pittermen én ómdat de kleinkènjer allang neit mee geluive, sjteit de Sinterklaos noots mee op miene kalender.

Ich rich mich noe langzaam op de Krismes, höb al get mee kaerse wie normaal op kes en taofele gezat en höb de krisboum van de zölder aaf-gehaold en op zien eige plek in de woonkamer gezat. De krissjtal gevöld mit de beelde en de res van de verseieringe kómme dees waek ouch nog d’rbiej. En dan mer haope op eine witte Krismes!

Bie die veurbereiing oppe Krismes heure veur ós ouch de veursjtèllinge van de Wiener Sängerknaben in ’t Parkstad Limburg theater, aafge-loupe vriedig. Veur de eesjte keer ‘laif’ gezeen en geheurd. Manjefiek. Ouch Krismes bie de Paek in ’t Toon Hermanstheater, ’t Kriskonsèr van de Phil mit ’t Mannekoor in de Grote Kirk en de Krismes-kaffe-klatsj in ’t Sjtröatje in Landgraaf heure bie die veurbereiinge… Veer sjpichte ós dao-op. Ich wunsj uch eine sjone tweede Adventswaek.

Pès de volgende van KUL pès KULTUUR, de lètste van dit jaor.
Gaer gedaon, reacties aan [email protected].