Van KUL pès KULTUUR - Waat vlug d’n tied

Van KUL pès KULTUUR, ein sjtökske Zittesj van John Hertogh veur uch - Jaorgank 9 nómmer 16 - 16 september 2024.

Zo óm de twee, drie waeke sjik ich uch van KUL pès KULTUUR, ein sjtökske Zittesj van mich veur uch. Intösje zeen d’r al weier sjoon evenemènte gewaes: ’t prechtige alternatief Sjöttefees en de Aope Monumentedaag, mit ónger angere de unieke oldtimer tour. En waat sjteit ós te wachte? Daags nao de traditionele film- en naokaartaovend wurt op zaoterdig 28 september ’t ZVK, Zittesj Vastelaovesleidjeskonkours gehawte in de Optochhal aan ’t Fischerpaad. Op dezen aovend zal de top drie gekaoze waere dao doorgeit in de sjtried óm oze Jubileiumsjlager 2025. Taeves zal in de categorie ‘covers’ ouch de bèste cover gekaoze waere. De hal geit aope om 19:00 oere, d’n aanvank is óm 20:11 oere en d’n inkóm is gratis. De aovend wurt traditiegetroew aafgetrap mit ‘t wènnende leidje van ’t aafgeloupe sezoen. Dat waar “Ich Aom Zitterd”, gezónge door Nigel en Luc. Tiedes daen aovend waere de prieze Bèste Nuujkómmer en ’t Meis Zittesj Elemènt sjus wie aafgeloupe jaor oetgereik. Pès zo wied de Vastelaovend. Wurt vervolg.

"Mit ein plestik tuut mit nuuj gimsjoon, ’n nuuj korte bóks, handjdouk en T-shirt fitsde ich d’r haer. ’t Op- en aafsjtappe ging mich al neit mee zo goud aaf. In de kleidkamer rook ‘t esof emes gans lang geleje zien zjweitzökke dao haw laote ligke.

Ónger leijing van de therapeut begoosj ich mit de eesjte eksersisie: eesj de boek intrèkke en dan op de kneie en henj 'ne saort superman sjpele. Dat lökde neit zo goud, ich kipde óm en ich kreeg al de metein de naam van super-opa. Daonao leit 'r mich doon esof ich op ein Franse wc zout: bein oeterein en vot achteroet. Wie ich daonao mous loupe wie 'ne soldaot, mer dan in slow motion, keek ich sjoew óm mich haer of hae soms versjtaoke kameraas haw opgehange… En wie ich thoes ómgang góng mit mien daaglikse eksersisies koume de kleinkènjer neit bie van ’t lache en höbbe metein fotoos van super-opa in actie gemaak. Gelökkig höbbe ze die (nog) neit op feesbouk gezat! Waag 't uch neit!" (oet mien perseunlik archief)

PS: Gounsdig a.s. sjteit in de gratis veurnikse bielaag de VIA van de gezèt (de Limburger) miene volgende rubriek euver Ós Modesjtaal. En wie ummer is dae dan ouch te laeze op mien feesbouk en op mien sait: www.zittesj.jouwweb.nl.

Pès de volgende van KUL pès KULTUUR . Mit de kómplimènte, © John Hertogh.