Ein vraog die me aan eemes kènt sjtèlle dae bv. Oktoberfees haet gevierd. Tja, dat waor weier ein ‘happening’ óm ’t in goud Zittesj te sjrieve!
Teminste waat ich d’r van gezeen, geheurd en gelaeze höb. Van de parade – mit ei bietsjke raege – höb ich genaote. Ich geluif dat ’t d’n eesjte keer is dat einen optoch zónger läöker door Zitterd höb zeen trèkke… Hae leip drie maol zo flot door, mer waor ouch drie maol kleinder es ‘ne vastelaovesoptoch! Sjoon. Terech euveriges dat lintje veur Sjef! Proficiat, nog èns.
Ich höb neit alles goud mitgekrege van de parade ómdat ich op ein plaatsj oppe Mert sjtóng wo ich alles goud koosj zeen, mer door de kirmesmeziek sjlech koosj heure! Zelver sjout. De res van ’t program höb ich neit gezeen, ómdat veer ein paar daag nao Twente zeen gewaes, óm ós lekker te laote verwènne, fejn te wanjele en mit de awdste kleindochter te kènne biekletsje.
Aeve d’roet. Herfsvakans, sjus wie vruiger, wie ich nog aan sjool sjtóng. En ’t waer haet ouch nog goud mitgesjpeeld. Lekker zunke en geine dröppel raege.
Waat is dat Twente toch ouch ein sjoon sjtreek. En Enschede ein sjoon grote sjtad (bekans 150.000 inwonesj). En ein fitssjtad, mer dat kump natuurlik door al die sjtudente. En verdomde gezèllig, mit al die terrasse.
Höb nog aeve kultuur gesjnoef. Es “hertogh(eer)” höb ich sjus euver de päöl ein kesjteel bezoch, kesjteel Bentheim. Waat ein prachtige burcht, midde in ’t sjtedje baovenop eine hoge rots. Klömme dus. Mer ich höb mich de ouge oetgekeke. Erf-prins Ferdinand haet ós (via ein videofilm) väöl vertèld! Dao sjrief ich nog waal ’s euver.
Mer noe de herfsvakans (in ’t zuje) veurbie is wilt ‘t neit zègke dat ’t röstig blif. D’r kump nog gans get op ós aaf. Óm te beginne is d’r zóndig de 29e einen dialekdaag in de Hanenhof in Gelaen, genuimp Limburgse Dialekdaag 2023. Óm 14:00 oer begint ein program mit deilnummesj van alle laeftieje, gedichter, vertèlsels, spoken-word, zank, dans en turne op meziek. Zelfs twee ‘awwe’ dichtesj (70plus) oet Zitterd doon mit! Entree baove de 17 jaor vief euro. De res veur niks. Wilt geer reserveiere: [email protected]. Op daensdig 31 oktober wurt Halloween gevierd. Halloween kump van All Hallows Eve = Allerheilige-aovend, ein awd Kelties fees.
De Keltische kalender begoosj op 1 november, dus 31 oktober waar awdjaors-aovend. De Kelte geluifde dat op daen daag de geister van alle gesjtórve luuj van ’t aafgeloupe jaor trök koume óm te perbeiere ein laevend lief te kriege veur ’t nuut jaor! Óm de geister aaf te sjrikke verkleidde me zich es mónster en zatte ze kaerse in oetgeholde krote aan de veurdeur. Ein aw traditie óm de dood weg te sjikke mit leichskes! Wae geluif wurt zelig…
Pès de volgende van KUL pès KULTUUR op 8 november. Blief gezóndj.
Reageiere: [email protected]
