Van KUL pès KULTUUR, ein sjtökske Zittesj van John Hertogh veur uch – Jaorgank 9 nómmer 9 – 22 april 2024.
De aafgeloupe waek höb ich kènne geneite van twee geweldige meziekevenemènte. Vriedigaovend sjpeelde in ’t Toon Hermans Theater ’t Eusteriekse koperseptet Mnozil Brass. Mnozil Brass is vernuimp nao Josef Mnozil van ‘t Mnozil Café taegeneuver ’t conservatorium in Wene, wo de muzikante in de neugitiger jaore èns per maondj ein jazzsessie sjpeelde. Es awd tubasjpeler höb ich ze ummer gaer wille zeen en heure. De eesjte maol in ’t Parkstad-theater en noe dan in ós eige sjtedje. Eine mix van professionaliteit, komedie en slapstick. Sóms lóchtig en blie, soms ernstig, zelfs absurd. De trómputte, trombones en de tuba bezörgde ós jedeskeer aafwisselend houndervel, dood-se sjtilte en de lachsjtupe. Ouch hun closeharmony gezank klónk fantasties. De zaal vol leifhöbbesj genaot van de eesjte pès de lètste menuut. Op ’t ènj woort veur de jäörige Karin Colaris – mien eesjte ‘träötjuf’ – Happy Birthday gesjpeeld en dochter Lisa moch op
de buun aeve mitsjpele!
Zitterd sjitterde weier.
Aafgelaope zaoterdig höbbe veer kènne geneite van ein gans oetverkoch Zitterd Sjittert, ein evenemènt van De Laammaekesj. De driede editie alweier. In Boeteplaatsj De Vief Heringe waar ‘t gezèllig én knatsjvol. Ein geweldig combo o.l.v. Cyrille Niël mit ein oetsjtaekende blaozersectie begeleidde bekènde Zittesje artieste. Feeby Niël , Younique, Fieny Cals, Esther van Cleef, Saskia Steuns, Marc Courage en Paul Ruigt brachte besjtaonde en eige Zittesje leidjes, mer ouch bewirkde of vertaalde wereldhits in ’t dialek. De volle zaal klatsjte, zjwejde en zóng volop mit. Nicole Schurgers zörgde op häör fien maneier veur ein humoristiese presentatie. Taege ’t eind van d’n aovend woort de driede “Laammaeker van ’t Jaor” oetgeroupe: de heer Lejao Beursgens. Ómdat hae neit dao waar, haw ‘r de pries veur ziene inzèt veur de Zittesje kultuur al eerder gekrege. Ouch de luuj van ’t geluid en ’t leich en de mitwirkesj van de Vief Heringe zörgde dat alles nao wunsj verleip. ’t Waar eine prachaovend. Dank aan Maurice, Mitchell en Rob! Geer houf neit op zuik te gaon nao ein groter podium, sjus dit ‘hoeskamergevuil’ is ein van de krachte van Zitterd Sjittert. En dat is neit allein mien meining!
Pès de volgende van KUL pès KULTUUR. Mit de kómplimènte, John
Reageiere: [email protected].
