Ós Modesjtaal : Van koeterwaals pès koete

Ein rubriek euver ’t gebroek van ós modesjtaal, dialek, plat. En vanwae-ge de zomervakans ein awd sjtökske:

Ich heurde lèts emes euver ós dialek kalle, dae haw ’t euver koeterwaals. Dat beteikent zoget wie ónversjtaonbaar gebrabbel. Bèn mer neit in discussie gegange... Höb waal gezóch nao dat woord. Waarsjienlik kump ’t oet ’t Dutsje Kauderwelsch mit de beteikenis: de taal die gesjpraoke woort in Chur, in Tirol Kauer genuimp, en die door de naoberlenj neit te versjtaon waar.

Welsch is ‘t zelfde woord es ‘t Hollese Waals en ‘t Èngelsje Welsh en geit trök op ‘t woord womit de Germane hun Keltiese naobervolke benuimde.

Me haet ’t waal ’s euver ein koetnaas, koetnelles, sjnoterkuke, sjnoterprie, sjnoterdöppe, koetaap of sjneuzelke. Allenej weurd veur ein klein jungske mit ein sjnoternaas. Koet is sjnoter. ’t Dutsje woord Kot beteikent drek, keutel of sjnoter.

Gans vruiger zag me in Zitterd: D’n erme sjmit ‘t eweg, de rieke sjtik ’t zich in de tesj (gebroekde eine sjnoefplak).

Ein anger woord veur sjnor waar: koetebremser. De naas oetsjnoeve is gans get angesj es zich de röksjtrank oetsjnoeve! In eine kwis van Veldeke en de gezèt vónj ich ’t woord koetele. In Zjwame zou dat toesje beteikene. Mer ich heurde ouch: de koet opzuike, sjlaope gaon. Koet zeen ouch de eikes van ‘ne vösj. In ’t Holles: kuit.

Op sjool woort dèks gekuit, oftewaal väöl lol gemaak. En neit allein door koetnaze. Koet woort ouch waal es kuit gesjreve mit de beteikenis: naas. Doe mós dien kuit neit euveral insjtaeke. Sjoon die gezègkdes. Ich höb d’r nog mee: Doe krigs eine sókkere niks mit eine lange sjtart, woort gezag taenge emes dae door zien gedraag gaar niks haw verdeind.

Of: Loup nao de maon en plök sjtarre, laot ze valle dan höbs te kralle…

Pès de volgende maondj! Dan kump eine gans nuut sjtökske.

Blief gezóndj. Reacties, vraoge, tips: [email protected]

Adverteren op Sittard-Geleen.nieuws.nl? De bezoekersaantallen blijven stijgen, wat onder andere goed is voor de zichtbaarheid van onze adverteerders. Wil jij je naamsbekendheid vergroten?

Wij denken graag met je mee om de reclame-euro zo optimaal mogelijk te besteden. Door lokaal te adverteren op Sittard-Geleen Nieuws tegen een concurrerende prijs! Neem contact op met Paul Storms via de telefoon: 06-22543972 of via de mail: [email protected].

De nieuwsredactie is te bereiken via [email protected].