Van KUL pès KULTUUR - Al weier trök

Van KUL pès KULTUUR, ein sjtökske Zittesj van John Hertogh veur uch - Jaorgank 9 nómmer 14 - 6 augustus 2024.

’t Liek zolang geleje dat veer op vakans ware… Intösje zeen al zoväöl gouw, fejn mer ouch gans verdreitige dènger passeierd, die-s te neit metein mitkrigs in ’t boetelandj, zeker este dao sjlechte of gein wifi höbs. Mer dat óntbraeke van wifi haet ouch veurdeile: me haet de rös wonao me op zuik is! En die höbbe veer gelökkig gehad. De batterie is weier opgelaje.

Ich zal uch neit vermuije mit de name van de läöker, gehuchter en dörper wo veer ditskeer gewanjeld höbbe of waat veer die daag allenej gezeen, gegaete, gedrónke en mitgemaak höbbe. De meiste vakanse-gengesj zètte dat allewiele op FB of Instagram! Ich perbeier mich te beperke mit get fotoos op mien feesbouk en mien sait. (oppe sait eesj es ich thoes bèn)

En waat sjteit ós noe nog te wachte in de res van de zomer? Veur de sjport-leifhöbbesj natuurlik de versjeie finales van de Olympische Sjpele in Paries, en korterbie de Sint Rosapercessie en ’t Sint Rosafestival - 't eesjte zónger Sjef – in ós eige Zitterd. Ich höb dao oots ein gedich euver gesjreve: Herinnering aan Sint Rosa (1990):

De eesjte keer mit de percessieIch waar sjus biej de fanfaar.
Loupe in dae sjuvende percessiepas,
Gister nog geoefend in 't rippetiesielokaal.
Óndanks de wesjpin wiebelt 't blaedje
mit de sjone nuje percessiemarsj
Ich blaos oppe miene zilvere tuba,
dae mit jedere sjtap zjwaorder wurt.
De zón en mien uniform zeen zo heit,
de baeremötsj maak 't nog get wermer.
Aaf en toe wurt ‘t mich te väöl.
en zèt ich de trööt mer effe aaf.
Zjweitdröppele pitsje in mien ouge
en wespe kómme geveerlik kortbie
Hawverwaege de berg sjtaon veer sjtil,
die van de Phil zeen al op de waeg trök.
Es veer ‘ns zo wiet zouwe zeen...
De tambour-maître begrip mich 
en blees op zien fluit.

Pès de volgende van KUL pès KULTUUR, euver twee of drie waeke. Mit de kómplimènte, John.

Reageiere: [email protected] .