Van KUL pès KULTUUR - Blajer

Van KUL pès KULTUUR, ein sjtökske Zittesj van John Hertogh veur uch - Jaorgank 9 nómmer 20 - 24 november 2024.

Ich zoug in mien ‘archief ’ dat ich bekans jeder jaor euver blajer en blaedjes höb gesjreve. Behawve dit jaor. Daoróm plaatsj ich dit awd sjtökske oet 2017; väöl is d’r neit verangerd.

D’n aafgeloupe tied haet de gemeinde weier blaadkörf geplaatsj. Dit jaor höb ich d’r neit veur houve te belle; opèns sjtónge ze d’r. Veer zètte ze veural wo väöl buim sjtaon, sjreve ze op Feesbouk! En ze zeen ouch begoosj mit ’t sjoonvaege van de ziepe. Neit euveral natuurlik, want neit alle buim verleize tegeliekertied hun blajer. Nu weite veer dat neit jederein jederen daag de eige sjtóp vaeg. Geinen tied, geine zin, ze kènne mich get, woróm betaal ich angesj belasting, enz.

Veural de get awwer luuj höbbe dèks muite daomit, mit dat vaege mein ich. Mer ouch mit ’t loupe euver de sjtóp dae vol lik mit blajer. Mit eine rol-later, waat ein woord, kump me neit goud veuroet en euver nate blajer kènt me flot oetlitsje. Ich zou zègke, help eur naobesj, es geer kènt.

’t Haet ouch zo zien veurdeile, dat vaege, blaoze of kaere. Me is in de frisje lóch en kump gaw in gesjprek mit naobesj en de luuj die langsloupe. Zeker es die d’n hóndj of hunj oetlaote. Dan heurs te nog ’s get. Dat is ouch ein saort ‘naobersjap’.

Euver de aopenbaar veurzeininge bie ós kènne veer huuj kóntent zeen: in d’n tied dat ich dit sjtökse höb gevónje en aangepas, is ’t awd pepier opgehaold en is de plej wo-aan ich woon gans vrie van blajer, nou gans …