Van Kul Pés Kultuur: Ein sjtökske Zittisj van mich veur uch
De St.Rosa viering, ‘t Sint Rosa festival en de kirmes en zeen alweier bekans achter achter de rök. De sjole höbbe ouch al aangevange, veur väöl luuj, mit name de awwesj beteikent dit: rös in de boet😉
Ómdat ich gein kaertjes haw, höb ich gekeke nao de registratie van de prechtige veursjtèlling Ein urke mit Sint Rosa van René Haustermans. Manjefiek. Cha-peau veur alle mitwirkesj. Euveriges ouch sjiek dat Ben Erkens oet Gelaen dit jaor de Veldeke Oeuvrepries haet gewónne. Ónger angere veur zien väöle (vastelaoves-)nummesj, ’t LVK, de band Valsj Plat en natuurlik Carboon.
Perfisiat Ben.
Kluch
Wiejer mit kultuur: Op 12, 13, 19, 20 en 21 september a.s. sjpeelt Sjpeelgróp Pancratius oet Munstergelaen de kluch De erfenis van tante Bella veur uch. Kaarte zeen te koop veur 12,50 bie de DA drogisterie in Munstergelaen en via speelgroeppancratius.nl De regie is in henj van Kevin Noblesse.
Einen daag later is Kirchrao jeet plat. Dat is ein dialek-sjpektakel in ’t ganse centrum van Kirchrao. Meziek, sjrievesj en dichtesj, toneel, teekezènge, pubkwis en nog mee. Ouch oet ós Zitterd doon minimaaal twee dichtesj mit: Lizette Colaris-Hinzen en John Hertogh. Te beloestere in de theaterzaal van de mezieksjool (baove de Hema) vanaaf 13:00 oer. Kóm kieke en loestere.
Limburgs dictee
Ouch wurt ‘t Limburgs dictee georganiseierd door L1 en Kirchroa jeet plat. Vanaaf 14:00 oer is daovan ein rechsjtreekse oetzending van Plat eweg op L1 mit Henk Hover vanoet ’t Kirchröädsj Vastelaovesmuseum.
Teen veurlaezesj oet Remunj, Mesjtreich, Venlo, Helden, Zitterd, Valkeberg, Zös-tere, Haelder, Weert en Kirchrao laeze ein zin veur in hun dialek en de deil-nummesj/ loesteraers oet de ganse provins waere opgeroupe óm dees zinne op te sjrieve op basis van de Limburgse Sjpelling 2003.
Viefteen deilnummesj kènne in ’t museum zelf mitdoon en de angere van hoes oet. Doog mit, zou ich zègke. Veur de wènnaer is eine sjone pries weggelag. Ónger ’t dictee traeje ouch nog twee zengesj op.
Es geer mit wilt doon, sjik dan eine mail nao nao [email protected] dan krig geer verdere aanwiezinge veur dit evenemènt.
Wenig kul dits maol in deze rubriek, ofsjoon… in Munstergelaen en ouch in Kirchrao zal zeker väöl te lache zeen.
Pès de volgende van KUL pès KULTUUR, euver ein waek of drie. 😉
Mit de kómplimènte, ©John Hertogh reageiere: [email protected]
