Van KUL pès KULTUUR - Euver ’t Groot Zittesj Dictee en de Alaaftrap

Van KUL pès KULTUUR, ein sjtökske Zittesj van John Hertogh veur uch - Jaorgank 9 nómmer 19 - 11 november 2024.

’t Waar ein gezèllige bieinkóms, ’t Groot Zittesj Dictee van Veldeke Krènk Zitterd in de Vief Heringe. Ónger de titel “Cultuur es hartsjlaag in tieje van bezuiniginge”, haet sjtadsdichter Drik Heffels ’t neugende Groot Zittesj Dictee gesjreve. Viefentwintig deilnummesj mouste de twelf zinne, gans dudelik veurgelaeze door Veldeke besjtuurslid Carina Daniëls, in goud Zittesj perbeiere op te sjrieve. Nao aafloup woorte ze same, in goud vertroewe natuurlik, naogekeke. Aaf en toe woort waal gediscussieierd (of gevreigeld) euver de sjriefwies van beveurbeeld “aom-benummend”, “gedichte(r)”, “däörehèk”, “blui(j)e” en “Lömmerich(t)erveldj”, mer oetèntjelik is jederein tevrei heivesj gegange. Martin Pfeifer maakde de wenigste faeler en wón dit jaor de houfpries.

Zelf höb ich óntdèk, dat ich al jaore dezelfde faeler sjrief: mien KULTUUR mót CULTUUR zeen volges Veldeke! Mer geer houf geinen angs te höbbe, d’n titel van mien sjtökskes blif van KUL pès KULTUUR en wurt dus neit verangerd. Ich bèn, óngerwiezers eige, toch eigewies en gebroek de sjriefwies van Paul Prikken z.g. dae ’t veur 30 jaor in zien “De taal van de Maas” (oet 1994) al haet euver ‘kultuur’, ‘kultereel’ en ‘kultuurhoes’. Bèn trouwes ouch benuud nao ’t vernuujde Gruin Buikske van ’t Zittesj dat bènnekort oetkump.

Vandaag, in awd Zittesj: huuj, is ‘t de 11e van de 11e Sintermaerte èn d’n aanvank van ’t Vastelaovessezoen! De radiowèkker maakde mich vanmörge wakker mit “Wie der Herrgott Limburg hat gemaak”. Doe höb ich metein euvergesjakeld nao ós eige Radio Nónnevot! Bèn neit allein eigewies, mer ouch nogal chauvinisties. De eesjte Sjpasvogel höb ich ouch al besjtèld ! En zaoterdig aansjtaonde, de 16e november, wurt ’t Vastelaoveshoes geäöpend (Lömmerichersjtraot nómmer 16) wo-in tiedes ’t vastelaovessezoen ouch de Marottewinkel kump. Door ’t jaor haer fungeiert ’t Vastelaoveshoes es museum.

Oppe Mert 16 november vanaaf 19:00 oer de Al-aaf-trap mit oetruiping van Sjtadsprins ?????? d'n ?e en de jubileisjlager ????? Veer laote ós verrassje.

Pès de volgende van KUL pès KULTUUR, euver ein waek of twee, drie.

Gaer gedaon, reacties: [email protected].