Van KUL pès KULTUUR - Geneite in 't häöfke

Van KUL pès KULTUUR, ein sjtökske Zittesj van John Hertogh veur uch - Jaorgank 9 nómmer 11 - 2 juni 2024.

D’n tied vlug óm, is dat zo of allein mer ómdat ich mit zoväöl dènger tegeliek óm-gang ben? Mót waal nog aeve kwiet dat ich ’t nog ummer jaomer vènj dat de dialek-aovend bie De Graven in Munstergelaen neit

is doorgegange. Woróm? Te wenig intresse veur ’t dialek? Ich lous sjus in de gezèt dat Veldeke Limburg ein paar nuuj jóng besjtuurslede haet gekrege. Dat belaof get. D’r zeen ouch al sjoon projèkte opgezat veur en door de jeug. Ichzelf gaon geweun door mit ‘t sjrieve in mien modesjtaal. Gelökkig zeen anger dènger waal doorgegange: ’t dialektoneel van Toneelclub Euverhaove waar ein groot sukses en dat van sjpeelgróp Pancratius Munstergelaen belaof ouch väöl gouds; Guus Kitzen

oet Sjipperskirk haet eine prachtige bundel oetgegaeve en ’t Gelaens Verzètje * waar ouch gans sjoon. Zelf zeen veer nao de “ Kaffeklatsj

” in ’t Sjtröatje in Landgraaf gewaes. Ein en al dialek, ge-wel-dig!

De aafgeloupe tied höb ich weier väöl veugel in ozen haof gezeen:sjpechte, mael-desj, vènke, zjwerbelkes en hègke- en hoesmösje. Gelökkig geinroeke; in Valkeberg zègke zeroke. Die kènne baeter wegblieve! Vanoet de beukehègk, de klimop en ónger versjeije daakpanne tjirpelt ’t aan de loupende bandj. Die beeskes höbbe väöl hónger, dènk ich. Lösde die jóng veugelkes mersjlekke, die kroepe d’r genóg. Es ’t röstig is kómme ouch deeikäörkeströk, ze zeen allewiel mit z’n twee. Vanaaf de tuintaofel, wo ze eesj deviejeulkesoet de pöt dabbe, kieke ze michastrant(vrech) aan. Mer ich gaon ze neit vouwere, sjtraks weite de ratte en roeke dat ouch!

Wós geer dat de gemiddelde tempratuur in ein normaal jaor in juni euverdaag 20,9 graad zou mótte zeen? Ouch zou in juni 7 oer zón per daag sjiene en veer zouwe 17 werm en 6 zomerse daag mótte kriege. Laot veer haope dat ’t èntjelik richtig vruig-jaor

wurt. Ich bèn d’r waal aan toe. Noe ich dit sjrief höb veer vas waer: raege.

Feeste in juni.

In Zweden, Noorwegen, Denemarken, Finland en IJsland wurt op 20 juni ’t mid-zomerfees gevierd. Op 24 juni, Sint-Jan wurt de gebäörte van Johannes de Duiper gevierd èn miene naamsdaag. In ós landj wurt vaderdaag gevierd op de driede zóndig in juni. Weier get óm nao oet te kieke dus.

Pès de volgende van KUL pès KULTUUR, euver twee of drie waeke. Mit de kómplimènte, John

Reageiere: [email protected] .