Van KUL pès KULTUUR - Sjleipe en sjtote, sjportzomerprogamma’s en Veldgewas…

Van KUL pès KULTUUR, ein sjtökske Zittesj van John Hertogh veur uch - Jaorgank 8 nómmer 16 - 1 augustus 2023

Ómdat ich neit ummer insjpiratie en gelaeg höb óm ‘ne nuje van KUL pès KULTUUR te sjrieve, ditskeer get nuuts mer ouch get oet de aw doos (mien archief, dus). Dat vintj geer zekergoud. ’t Geef in ’t Zittesj goud mit de Hollese beteikenis ‘goed’ en goud mit de beteikenis van ‘goud’ (edelmetaal). ’t Versjil zit ‘m in de oet-sjpraok: es me ’t mitsjleiptoon oetsjprik is ’t goud (~) = edelmetaal en mit desjtoottoongoud (\) = goed. Mer waal allebei mit de eind -d gesjreve.

De teikes ~ en \ waere neit dèks gebroek óm dat versjil aan te gaeve. In ganse aw buik zuus te ’t waal ‘ns es gout gesjreve, of zelfs gaut mer dat is toch ech awdvraensj

. ( dat is awdfrankisch veur awwerwèts). Anger veurbeelde zeen: sjtein

: mit sjleiptoon= ‘steen’, mit sjtoot-toon = ‘stenen’, of bal = 'róndj veurwerp' en bal = 'dansfees' en ein bein en twee bein.

Aafgeloupe waek waar ’t hie sjlech waer dus woort ‘r mee tv gekeke: nao de finish van ’t fitserenne, tennis, WK voetbal veur vrouwe en polletik. Mer van dat lètste höb ich aeve aafsjtandj genaome, geer kènt uch mesjiens waal veursjtèlle woróm.

Anger zomerse zake:

Väöl luuj zeen nog mit vakans en dat mirks te goud. ’t Is röstig in de sjtraot, wenig sjpelende kènjer, bletsjende hunj of bbq-feeste. Ich höb mich toch e

bietsjke bezig kènne hawte mit – wie kènt ’t ouch angesj – sjrieve!

Kènt geer de rubriek Veldgewas

van Wim Kuipers nog? Die is nao ein 'rösperiode' door ein nuuj redaksie 'gereanimeierd'. Veldgewas is ein rubriek

veur Limburgs-talige tekste. Saer 2011 publiceierde dit magazine ónreigelmaotig’ literatuur, po-ëzie en anger laesvouwer in ’t dialect. Mer… sjrievers en dichtesj kènne vanaaf noe weier hun wirke opsjikke nao [email protected] . Mitdoon gaer!

Verhaole (zkv'tjes, zeer korte verhaole) en gedichter. Via de website van Veldeke Limburg ( www.veldeke.net

) versjient de vernuujde Veldgewas vanaaf september mer noe reigelmaotig , 10 maol per jaor.

Es geer eige tekste wilt aanlevere, sjik ze nao [email protected]

. Behawve ein nuuj redaksie haet me ein vieftal Limburgse sjrievers/dichtesj aangesjtèld es ‘sjriever van deins’. Die levere sowieso jedere maondj hun biedraag in. Geer kènt uch waal veursjtèlle wae dao ouch bie zit!

Ein gratis abonnemènt krig geer door ein mailtje mit ‘Abonnement Veldgewas’ te sjikke nao [email protected]

. Dan kènt geer ummer geneite van sjoon Limburgstalige sjtökker.

Pès de volgende van KUL pès KULTUUR. Reageiere: [email protected] .