Van KUL pès KULTUUR, ein sjtökske Zittesj van John Hertogh veur uch - Jaorgank 9 nómmer 10 - 14 mei 2024.
Nao ein paar daag wanjele in ós geleifde Eifel, loug ein sjtaepelke gezètte vaerdig óm ’t awd nuuts te laeze. Waat in ‘ne korten tied kènt gebeure…Klein en groot nuuts, ich laes ’t allenej. Van de sjtried taegen ’t aafsjeite van zjwerf-katte in Friesland, de rel óm de Hema roukwoosj, de sjoud van MVV, euver de eige sjtreektaal sjpraeke in de kènjeropvang, euver de pilsindex, de mien Beatrix in Remunj, euver ’t neit doorgaon van de Optochfilm van de Marotte en de Marcellinus en Petrusfeeste in ’Zitterd-zuid’, euver de sjtried tösje de krankehoezer van Zitterd en Haelder, euver ’t Europees Leidjesfestival in Zwede, enz. enz. enz. Maar dat zult geer ouch waal allenej höbbe gelaeze.
Aeve get reklaam make…
Mörge – 15 mei - maag ich weier ein toneelsjtök recenseiere. Toneelclub Euverhaove sjpeelt in ’t Gemeinsjapshoes ’t Waope van Lömmerich
hun nuutste sjtök: "Hallo, blief geer effe hange". 't Wurt ouch nog gesjpeeld op 16 en op 19 mei (matinee), op 23, 24 en 25 mei. Kaertjes kent geer besjtèlle bie
www.toneelclubeuverhaove.nl . Woróm in Lömmerich? Ómdat ze nog geine nuje oetbater van Gemeinsjapshoes ’t Kaar in Euverhaove höbbe gevónje, maag de toneelclub tiedelik in 't Waope van Lömmerich sjpele. Me haop dat ze volgend sezoen weier trök nao Euverhaove kènne. Daags d'rop dónderdig 16 mei
om 20:20 presenteiert Veldeke Zitterd bie De Limbourg baove: Zitterd kalt en zingk
, eine biezunjere aovend veur de leifhöbber van ’t Zittesj.
Noe ich toch ómgang bèn…
Op
dónderdig 23 meia.s. verzörg de Algemeine Sjrieverskrink Veldeke Limburg i.s.m. Veldeke Krènk Zitterd-Gelaen van 19:00 pès 21:00 oer eine
Dialek-aovend mit korte veurdrachte, gedichter en eine dialekkwis en…
troubadour Jos Meessendae laif kump zènge!! Dit allemaol bie Gilde De Graven in ’t Gemeinsjapshoes ’t Trefpunt aan de Pancratiussjtraot 24 in Munstergelaen. Insjrieve gaer via
www.gildedegraven.nl .
Nog eine dan…
De vieftigste daag nao Paosje is ’t Pènkste. In miene rubriek Ós Modesjtaal dae vanaaf gounsdig is te laeze höb ich dao ouch euver gesjreve. Dao sjteit ouch waat eine pènkspummel is!
Pès de volgende van KUL pès KULTUUR. Mit de kómplimènte, John
