Van KUL pès KULTUUR - vekans, KMS en oze Teun

Van KUL pès KULTUUR, ein sjtökske Zittesj van John Hertogh veur uch - Jaorgank 10 nómmer 6 - 1-4-2025.

Geer höb drie waeke gein sjtökske Zittesj van mich veur uch gekrege. Ich moosj aeve biekómme van 't berich van de redaktie van de VIA euver 't per direk ein ènj make (van hunne kantj) aan de samewirking betreffend miene rubriek Ós Modesjtaal, dae ich vief jaor in de gezèt höb kènne plaatsje. Nae, da's neit de raeje, ich höb geweun weier aeve vekans genómme! Bèn ó.a. gezèllig nao Nijmegen gewaes en höb genaote van 't sjone waer in d'n haof dae ummer gruiner wurt. Vraog: wit emes wie ich dat verdölde zeveblaad (ónkroed) weg krieg zónger gif te gebroeke? Mit zoer of aetje mesjiens?

Geweun wiejer dus mit van KUL pès KULTUUR. In de tösjetied höbbe veer ouch get dènger in en óm 't hoes laote doon: in de kelder en garaasj de waterleijing vervange en nuuj led-boeteverlichting ónger de euverkapping gekrege. Ich krieg ummer mee respek veur luuj die dees ambachte oetvuiere. Chapeau.

Aeve euver de KMS, de Kennedymars van aafgeloupe Paosjzaoterdig. Es wanjelaer höb ich dao gouw herinneringe aan. In mien jónger jaore höbbe veer mitgedaon aan dae 80-kilomaetertoch en ich höb 'm veier maol gans oetgeloupe. De viefde maol leip ich sjtoer achter 'ne gróp soldaote, mer oetèntjelik góng dat get te vlot en moosj ich in Thoöer mit kramp in de kute aafhaoke! Die eesjte veier maol gónge veer ouch nog nao 't blaorebal, oppe sjlippesj of grote sendale! Mer, das war einmal. Mit twee nuuj häöpe en reigelmaotige las van nek en hielsjpaor én miene laeftied zeen ich dat neit mee zo zitte. Veer gaon waal ummer kieke nao d 'n intoch. Waat ein wanjelaesj. En gezèllig, dae meziek van de versjeie 'zate hermeniekes' en oppe Mert zelfs ein zangkoor. En al die vriewilligesj die dao-aan höbbe mitgewirk! Prechtig. Dat zèt Zitterd weier goud oppe kaart. Euveriges, ouch de luuj (en kènjer) die de Swentiboldmarsj van 40 km en de Minimarsj van 10 km höbbe geloupe: goud gedaon, patsj aaf. Es ich noe begin te oefene, zou ich volgend jaor mesjiens toch de Swentiboldmarsj mit kènne loupe… Ich belaof niks.

Eergister waas 't trouwes de 25e sjterfdaag van oze Teun. Jaomer dat 'r in zien gebäörtesjtad zo wenig aandach aan wurt gesjónke. Gelökkig op L1 TV en radio waal. Ich höb ummer van zien shows, zien leidjes en gedichter genaote.

Pès de volgende van KUL pès KULTUUR, [email protected].