Op zaoterdig 6 jannewari 2024 is Mark Rooding op een ongekènd spectaculaire meneer oetgerope tot Prins van ’t Louverriek.
Same mit zien Prinses Pascalle zal hae ‘t komende vastelaovessezoen regere es Prins Mark I euver alle Louvermenkes en Louverwiefkes.
De nuje prins woort bienao 40 jaor geleje gebóare in Zitterd, Sanderbout om precies te zeen. Dao haet hae zien jeug doorgebrach en is hae nao sjóal gegange, enne echte Laammaeker dus. De nuuj prinses is ein rasech Louverwiefke. Dat ze Louverblood door de aojes haet sjtruime, haet ze al beweze es kleuterprinses en later in 2001 es jeugprinses van ’t Louverriek. Ouch waor ze Bar-prinses in 2011. Ze zeen 11 jaor geleje getrouwd naodet ze hun prinselik paleis oppe Kieërwaeg 52 verboewd hèjje. Dao wone ze nog ummer same mit hun kenjer Yves en Izzy.
Prins Mark wirk ès projectleider bie installatiebedrief John van Neer oet Ech. ’t Belangriekste project van dit jaor is ’t prinssjap van ’t Louverriek. Dit haet hae zien collega’s inmiddels al laote weite. Prinses Pascalle wirk es verzörgende IG in zorgcentrum Lemborgh te Zitterd.
’t Prinsepaar is erg actief in hunne vrieje tied. Zwa is de prins tamboer en besjtuurslid van Stadssjötterie St. Rosa oet Zitterd. D’r höbbe al versjillende gesprekke plaatsgevonje mit de prins om de euversjtap te make nao de Sjötterie van Buchte. Tot noe toe haet al dat gekal nog niks opgeleverd. Gelökkig haet hae waal jao gezag op de vraog van De Louvermen óm prins te waere.
Dat hae nog ummer gaer in Zitterd kump, leut ozze prins zeen es troewe supporter van Fortuna Sittard. Al vanaaf de tied dat Fortuna nog in de Baandert sjpeelde, sjleit hae geine wedstried euver. Es hae dan nog get tied euver haet, klus Prins Mark in en om hun hoes of geit hae ein pilske drènke bie café De Bar same mit Prinses Pascalle of ziene sjóanpap.
Prinses Pascalle is naeve höör werk veural bezig mit de zörg veur hun kènjer. Zie ongersjteunt hun bie ’t voetballe of es Izzy geit danse. Om dao eine goje balans in te hawte, deit ze aan yoga en pilates. Ouch geit Prinses Pascalle gaer nao ein concert of bezeuk in de zomermaonje ein festival zwa wie Bospop of Pinkpop.
Wujer gaon prins en prinses gaer ein weekendje weg of urges ein sjtökske wanjele, sjpraeke ze aaf mit vrunj en gaon urges ein hepke aete. Ouch enne daag daag d’r op oet mit hun gezin doon ze gaer.
Prins Mark I en Prinses Pascalle kent geer, same mit ’t op 13 jannewari 2024 nog oet te rope jeugprinsepaar, kómme felicitere op de prinsereceptie van Karnavalsvereiniging De Louvermen. De receptie vundj plaats op zunjig 21 jannewari 2024 vanaaf 11:11 oer in ’t gemeinsjapshoes aan ’t Kirkvonjere in Buchte.
