Van KUL pès KULTUUR - Euver de nónnevot

Van KUL pès KULTUUR, ein sjtökske Zittesj van John Hertogh veur uch - Jaorgank 10 nómmer 3 - 20-2-2025.

Dao bèn ich toch waal aeve van gesjrókke: de Zittesje nónnevot is gesjtórve! Teminste dat heurde ich in de twelfde aaflevering van de Sjerp en Ruig vastelaovespodcast van Peet van Erp en Paul Ruigt op Radio Nónnevot. Ze vrouge zich aaf wo ’t nog eine richtige Zittesje bekker geef dae zelf zien nónnevotte bak volges awd recep en ouch wit wie de nónnevot gesjtrik mót waere!

Mesjiens dat ’t tied wurt dat dat vastelaovesgebak ein BGA produk wurt, ein uniek produk mit besjermde geografische aanduiding, sjus wie de Limburgse vlaai dat noe is. Dat BGA gedouns zal sowieso minstens nog zeve jaor doere volges bekker Marcel Roubroeks oet Euverhaove. Dae waar ouch gas in de ’studio’, same mit Janneke Philippi, ein kaokbouk sjriefster. ‘t Duo P&P (Peet en Paul) haw ’t euver de sjmaak en vórm en wie me aan de naam nónnevot is gekómme. Ze sjprouke d’r euver dat de naam kump van óf van ’t gebeks dat luuj krege die kleier (vodde) nao de nónne brachte óf de sjtrik die de nónne vruiger achter op hun habijt hawwe. Dat zouw kènne want in sommige Limburgse plaatsje nuimp me ein nónnevot ‘ne sjtrik. Wiejer woort nog gesjpraoke euver eine knoup of mee knuip in de nónnevot. In ’t RegioArchief van de gemeinde vónj ich ‘n sjoon verhaol euver de vórm van de nónnevot op de scepter van de prins: dae haet ein tiedje twee krölle gehad! P. Schelberg haet ’t in zien Zittesj woordebouk d’r euver dat nón ein zeug is, mit rónj en vètte batse en dat de naam nónnevot daovan zou kènne kómme. Dr. F. Debrabandere sjrif in ’t Limburgs Etymologisch woordebouk dat nónnevot kump van nónnefort. Fort beteikent hie sjeet. In ’t West-vlaams wurt ’t vastelaovesgebak ouch nunnesjete of nunneschitje genuimp! Ich vónj ouch ein sjoon ómsjrieving veur sjeet: boekwèndj. Waat me van dae vastelaovespodcast neit alles kènt lere! ’t Doert nog effe mer ich wunsj uch alvas ‘ne sjone Kènjeroptoch en eine zelige Vastelaovend! En laot uch de nónnevotte sjmake… zo lang ’t nog kènt. NB. Ich zoug dat vlak bie de Mert eine nuje bekker is gekómme en jao, dae haet ouch nónnevotte! Ich gaon pruive.

Pès de volgende van KUL pès KULTUUR, [email protected].