Van KUL pès KULTUUR - Wèntjertied, Groot Zittesj Dictee en Halloween

Van KUL pès KULTUUR, ein sjtökske Zittesj van John Hertogh veur uch - Jaorgank 9 nómmer 18 - 29 oktober 2024.

Zeet geer al gewènd aan de wèntjertied? Ich höb d’r wenig van mitgekrege, jao ein urke langer kènne sjlaope. Vraog mich trouwes aaf of dat wissele tösje zomer- en wèntjertied nog neudig is. Wie lang zeen ze de al euver aan ’t discussieiere? Da’s polletik en de vaste laezesj van mien sjtökskes weite dat ich dao wenig mit ophöb. Me mót sowieso oplètte waat gezag en gesjreve wurt. De veurige keer sjreef ich get euver ‘t evenemènt wobie de nuuj Oktoberfeesmiss woort gepresenteierd oppe Mert in Zitterd. Ich sjreef dat ich dat evenemènt sjameswaerd vónj. Ich dènk dat sómmige mich dat toch neit in dank höbbe aafgenómme. Daoróm höb ich zelf mer in sjtilte geprotesteierd door neit nao Oktoberfees TV te kieke… Ich heur leiver Zittesj es Holles! ’t Oktoberfees zelf waar waal weier ein prechtig sjpektakel! Ein extra patsj aaf veur alle vriewilligesj.

Veurdat ich ’t vergaet: dónderdig 31 oktober wurt ’t Groot Zittesj Dictee gehawte. Om 19:30 bie De Vief Heringe. De inkóm is veur niks, waal gaer aeve aanmelje via [email protected] want ’t aantal plaatsje is beperk. Ein paar tips van meister John: de è (sjtraepke nao lènks): bèd of nèt; de ó (sjtraepke nao rechs) lóch en mótte. De ae: gaer, baer. De ao:  kraom of  paol ; in ’t Zittesj gaef ’t gein klank oa! De äö päölke, träöt en väöl dus neit vööl!; De aw: kaw(d); aw(d), gaws, kawf, hawf. Aope lèttergreep: sjus wie in ’t Holles: moder, wages; grote; erepries. Leenweurd es ingenieur, repertoire: sjus wie in ’t Holles.’t Dictee is dits keer gesjreve door óze sjtadsdichter Drik Heffels oet Bor! Es geer mitdoot: väöl sukses! Ich gaon zeker d’r haer, of ich mit sjrief weit ich nog neit ! Ich maag namelik niks veurzègke…

Op daen dónderdig is ’t ouch Halloween, mer dao sjrief ich neit gaer euver. Ómdat ich die griezelige figure die dèks ónger ’t nepbloud zitte en euveral ‘gewóndj’ zeen väöl erger vènj es ein fien zjwart gesjmink gezich van de helpesj van Sinterklaos! Ich haw weier ein sjoon foto van Zjwarte Piet gekrege en dem gedeild op mien feesbouk. Drie daag woort ‘r gedeild en daonao weggehaold door FB. Ónzin toch.

Van ’t Oktoberfees nao Vastelaovend is mer eine kleine sjtap. ’t Is jao bekans de 11e van de 11e. En op 16 november de Alaaftrap oppe Zittesje Mert. Op Marotte TV kènt geer ’t ganse pregram van ‘t 13x11 jubileum zeen: Plök de daag! Ouch L11 Alaaf is al drök ómgang gewaes mit ’t zuike van ’t Vastelaovesgezich 2025. Ich zoug ze veurbie kómme en vónj ze sjtök veur sjtök allenej aeve sjoon.

Zo, dat waar ’t weier veur noe. Gaer gedaon. Mit de kómplimènte van John.

Pès de volgende van KUL pès KULTUUR, euver ein waek of twee, drie.

Reacties te richte aan [email protected].