Ós Modesjtaal: Ein rubriek euver ’t gebroek van ós modesjtaal, dialek, plat

Wikimedia

Het eerste en tweede wapen van Sittard

Vanwaege mien Krisvakans sjik ich uch ein awwer alvas vaerdig gezat en bewirk sjtök dat ich vief jaor geleje sjreef en dat ouch in miene bundel Van Oukouk pès Cötelbaek sjteit, mer nog neit oppe sait van Veldeke Limburg of in Sittard-Geleen.nieuws.nl haet gesjtange.

Geine sjnei dit jaor?

Jaomer, mer van de angere kantj höbbe veer ouch gein nöttigheid es de sjnei geit sjmilte. Want dan wurt ‘t sjnel pratsj. Zeker door dikke benj van die fatbikes of door sjtevele die d’r euver haer loupe. Of es de sjtruiwages hun wirk höbbe gedaon. Dae weike, hawf vloeibare, nötte sjliek. Dus gaer geine pratsj aan de vuit. Dat is trouwes ein gezègkde mit de beteikenis: ’t voele wirk (veur emes) doon.

Klein kènjer die aan ’t kleure of sjildere zeen, pratsje ouch dèks vanal doorein. En es emes sjlechte waar haet aafgeleverd, krig hae te heure dat ‘r ouch mer get inein gepratsj haet. ’t Geef ouch luuj die hunne middig doorein pratsje! Pratsjentaere maaks te dan pratsj. Pratsj is neit percies ‘t zelfde es tódder, want bie tódder kump dèks ouch zandj kieke.

Van módder en mee

De weurd tódder en toter woorte vruiger in Zitterd en ómsjtreke mee gebroek es vandaag d’n daag. Noe zaet me módder, bekans wie op ’t Holles. Väöl dialekweurd verdwiene op dees maneier… jaomer. Euver dat verdwiene van dialekweurd haet Paul Weële ein sjtök gesjreve in Veldgewas van december 2025. Geer kènt ’t vènje op veldeke.net klik mer op Welkom bij Veldgewas - Veldeke Limburg.

Mer trök nao pratsj. Pratsj klink toch väöl sjoner es blubber! In de Kolleberg rótsje veer door de pratsj! Ich herinner mich beelde van de Knastercross in Geulle , wo me aan pratsj-volleybal deig. Sjoon óm te zeen, op aafsjtandj dan waal! Mer ouch dae Knastercross besjteit neit mee… Veurdat ich nostalgisch waer, trök nao ’t óngerwerp:

Sjladder (slib in ’t Holles) kump me taege es eine wiejer of baek wurt laeggehaold. Wie ich veur ’t eesj de baom van de Zittesje roei-viever zoug, wie dae gans laeg waar, voul ’t mich taege… gein fitse of winkelwages of anger berosde sjatte. Dat waar bie ’t Juliana-kanaal aafgeloupe september toch gans angesj!

Of tattie famieje is van pratsj , weit ich neit. Kènjer die nog neit goud kènne moele gebroeke waal ‘s ‘t woord tattie. Hun awwesj trouwes ouch. Ze meine dan sjmerig sjpul. Dat kènt varieiere van sjnoterbelle pès verf wo te väöl vies kwaste doorhaer zeen gewaes. ’t Woord pratsj wurt ouch gebroek veur gesjpuus, tuug, krapuul: „Waat dao woont is pratsj!” Euver tuug gesjpraoke: de naam Flodder riemp ouch op modder! Bie ’t zuike stootde ich nog op ’t Sjotse woord tattie-soup, veer zègke dao aerpelesop taege!

Pès de volgende maondj. Dan bèn ich trök mit ein vónkelnuuj sjtök Ós Modesjtaal. Blief gezóndj.

Van John Hertogh oet Zitterd

Reacties: [email protected]

♦♦♦

· Blijf op de hoogte via Facebook, X of via de nieuwsbrief, inschrijven kan ook onderaan deze pagina.

· Lokaal(pers)bericht of evenement insturen? Dat kan via [email protected].

Adverteren op Sittard-Geleen.nieuws.nl? De bezoekersaantallen blijven stijgen, wat onder andere goed is voor de zichtbaarheid van onze adverteerders. Wil jij je naamsbekendheid vergroten?

Wij denken graag met je mee om de reclame-euro zo optimaal mogelijk te besteden. Door lokaal te adverteren op Sittard-Geleen Nieuws tegen een concurrerende prijs! Neem contact op met Paul Storms via de telefoon: 06-22543972 of via de mail: [email protected].

De nieuwsredactie is te bereiken via [email protected].