Ós Modesjtaal. Fibberwari góng sjnel veurbie. Waat brèngk meert?

Op zuik nao waersjpreuke euver meert vónj ich d’r mer wenig: eine dreuge meert en eine nate april is de boere nao hunne wil en de variatie: meert haet eine krol in ziene sjtart.

Qua feesdaag is ‘t ouch röstig: op 19 meert St Joep, meistes aafgebeeld es tummerman , soms ouch mit twee doeve. Dees doeve symboliseiere dèks zuverheid (reinheid) en troew. Hae is de paträönder (patroon/besjermhèllige) van ó.a. tummermen, begraefenis-óngernummesj, ’t hoesgezin, veur de vlotte verkoup van ein hoes, taege woningnood en es patroonheilige veur ’t Belsj.

In Zitterd is dan de grote St.Joep-jaormert.

Dit jaor is op daen daag ouch ’t Sókkerfees, de islamitische feesdaag wo-op’t ènj van hunne vastemaondj (ramadan) gevierd wurt. Einen daag later, op de 20e, begint de lente, mit ein awd Zittesj woord ouch waal d’n oethawt genuimp (volges P.Schelberg) Dao sjpich (of sjpits) ich mich richtig op. Dan kènne veer haopelik weier dèkser d’n haof in. Al is ’t mer óm dao get te böttele.

Es ‘t väöl raegent nuimp me dat ouch waal wessig waer (groeizaam op zien Holles). Nog ein awd gezègkde: Ich zeen lever eine wouf in ’t veldj es veur hawf meert eine plougsjtart. (L.van der Heijden) Volges häöm beteikent dat: Veur hawf meert mót me ’t landj neit gaon bewirke. In ozen tied zuut me lever gaaroets geine wouf in ’t veldj, toch?

Wos geer trouwes dat me behawve fizzelraege ouch zouwelraege of zeiverraege taege motraege kènt zègke? En es me blif klage euver ’t waer heisj dat: Sjtein oet de gróndj klage. Euver sjtein gesjpraoke: Waat höbbe abbelekoze, keesje, peisje en proeme allenej ‘t zelfde? Dat is sjteingoud, steenvruchte dus. Sjtein in de beteikenis van pit of kaer. En tensjlotte: Wit geer waat sjievelsjtein zeen? Dat zeen die platte sjtein óm te sjievele, dwz euver ’t water laote sjtutere of ketsje; in ’t Èngelsj stone skimming!

Pès volgende maondj, mit de kómplimènte,

gebere oftewaal reageiere: [email protected].

john ©zittesj

·         Blijf op de hoogte via Facebook, X of via de nieuwsbrief, inschrijven kan ook onderaan deze pagina.

·         Lokaal(pers)bericht of evenement insturen? Dat kan via [email protected].

Adverteren op Sittard-Geleen.nieuws.nl? De bezoekersaantallen blijven stijgen, wat onder andere goed is voor de zichtbaarheid van onze adverteerders. Wil jij je naamsbekendheid vergroten?

Wij denken graag met je mee om de reclame-euro zo optimaal mogelijk te besteden. Door lokaal te adverteren op Sittard-Geleen Nieuws tegen een concurrerende prijs! Neem contact op met Paul Storms via de telefoon: 06-22543972 of via de mail: [email protected].

De nieuwsredactie is te bereiken via [email protected].