Van KUL pès KULTUUR - Euver de hèlf

Van KUL pès KULTUUR, ein sjtökske Zittesj van John Hertogh veur uch - Jaorgank 9 nómmer 13 - 14 juli 2024.

Veer zeen al twee waeke euver de hèlf van ’t jaor 2024. Ich koum op Feesbouk al ein herinnering taege: euver 23 waeke is ’t Krismes! ’t Mót neit gekker waere…

Veur daen tied is d’r nog zoväöl sjoons te doon. Ich gaon ditskeer neit alle evenemènte in en róndjóm Zitterd opnuime, die sjtaon allewiele al op zoväöl plekke. ’t Is waal jaomer dat de raegesjoele en ‘t sjlech waer dèks de sjpas bedórve höbbe. Gans vruiger zag me hie dan:dat of dae haet mich de sabbat verknibbeld! Letterlik is de sabbat natuurlik de Joodse rösdaag dae begoosj op vriedigaovend en eindigde op zaoterdigaovend. Wie-t geer wit waar d’r in Zitterd eeuwelang een bluijende Joodse gemeinsjap, mit ein synagoge in de Meulenbaekstjraot en later in de Plakstraat en ein eige begraafplaatsj op Fort Sanderbout en later aan de Dominicanenwal. Mesjiens dat baovesjtaonde oetdrökking oet daen tied sjtamp.

Dit sjtökske höb ich in verbandj mit ós vakans al get vruiger gesjreve, daoróm geit ’t neit euver aktueel zake. En ómdat ich minder tied höb zeen de lettesj ouch get groter. Zuikend nao ein nuut óngerwerp vónj ich weurd die ich saer jaor en daag neit mee gelaeze of geheurd höb.

Ich wil ze gaer mit uch deile: flatsje veur ein eksame, de röksjtrank oetsjnoeve, kelle henj höbbe, de achteropsjöt, brozele oppe baom van de kaffetas, eine watsj óm dien ore kriege, las van eine waegesjeet höbbe, dampetig waer, vottetesj , dae haet eine fie-mel , kuulkesjarre mit uve , dat is eine gaaplaepel, hae tóddelt zich get aan .

Zo kèn ich nog lang doorgaon, mer mesjiens ein anger maol. Ich vang mer aan mit de wage (te laote) wesje, de kóffesj te pakke, ’t graas te sjnieje, d’n haof sjóffele… geer kènt dat waal. Ich wunsj jederein alvas ein sjoon vakans, veural mit get mee zón es pès noe toe!

Pès de volgende van KUL pès KULTUUR, euver twee of drie waeke. Mit de kómplimènte, John.

Reageiere: [email protected] .