Van Kul Pés Kultuur: September, herfs- mer ouch festivalmaondj
De maondj september is alweier bekans óm. Daomit kump ouch ein ènj aan de versjeie festivals, zo wie beveurbeeld de Limburg Love Parade in Gelaen.
Ich sjreef al eerder euver “Kirchroa jeet plat” wo ouch de Zittesje dichters Lizette Colaris-Hinzen en John Hertogh hun gedichter veurlouze en ichzelf ouch nog mitdeig aan ein Limburgs dictee dat bie Plat-eweg van Henk Hover (L1) rechsjtreeks oppe radio woort oetgezónje. Oze eige Skinnie tensjlotte zóng zelfs in ’t sjtadhoes van Kirchroa.
En zóndig is ‘t Geheime tuinen festival mit ónger angere Baroesjko - miene favoriete laif-bend - in d’n haof van de Agneten, wo ouch dichtesj hun weurdje deige. Op vriedig 26 september is dan nog ’t Zittesj Vastelaovesleidjes Konkoer in Poppodium Volt. Zeve originele leidjes perbeiere de Thei Hunnekes – Trofee te wènne en 6 zogenuimde covers zörge veur nog mee fees. Ouch ver-zörge Spik & Span ein gastoptraeje. De zaal is aope óm 19:30 oer.
Väöl luuj sjpichte zich intösje ouch op ‘t kómmende Oktoberfest. En de kènjer natuurlik op hun herfsvekans! Herfs..ich höb dao gans get gedichter euver gesjreve en ouch in oze Algemeine Sjrieverskrink Veldeke Limburg kump dat jeder jaor aan de orde. Ich höb d’r ein oetgekaoze, oet 2012, van óze awdste sjrieversvrundj en dichter Theo van Dael (91) oet Kinrooi:
Geweldig
Ich loup in de bósj mit buim en sjtruuk – haol mien naas op - en ich ruuk de hu-musrieke dóffe gróndj - krieg ’t water inne móndj - want wiej ‘nen egel wil ich vruitele in ’t half vergange broen wiej keutele… kiek nao baove nao blajertek - in bewaeging sjtil of gek - en loester gretig - kan neit sjtoppe - mer heur allein mien hertje kloppe!
Ich höb ’t gedich waal ómgezat in ’t Zittesj, mer dat wiek gelök-kig neit väöl aaf van ’t Kinders.
En dan die blajer…
De gemeinte haet nog gein blaadkörf geplaatsj. Ze zeen waal begoosj mit ’t sjoonvaege van de ziepe. Noe weite veer dat neit jederein elke daag de eige sjtóp vaeg. Geinen tied, geine zin, ze kènne mich get, woróm betaal ich angesj be-lasting, enz. Veural de get awwer luuj höbbe dèks muite daomit, mit dat vaege mein ich. Mer ouch mit ’t loupe euver de sjtóp dae vol lik mit blajer. Mit eine rollater kump me neit goud veuroet en euver nate blajer kènt me flot oetlitsje.
Ich zou zègke, help eur naobesj, es geer kènt. ’t Haet ouch zo zien veurdeile, dat vaege, blaoze of kaere. Me is in de frisje lóch en kump gaw in gesjprek mit naobere en de luuj die langsloupe. Dan heurs te nog ’s get. Dat is ouch ein saort ‘naobersjap’.
Mit de kómplimènte, ©John Hertogh, reageiere: [email protected]
♦♦♦
· Blijf op de hoogte via Facebook, X of via de nieuwsbrief, inschrijven kan ook onderaan deze pagina.
· Lokaal(pers)bericht of evenement insturen? Dat kan via [email protected].
Adverteren op Sittard-Geleen.nieuws.nl? De bezoekersaantallen blijven stijgen, wat onder andere goed is voor de zichtbaarheid van onze adverteerders. Wil jij je naamsbekendheid vergroten?
Wij denken graag met je mee om de reclame-euro zo optimaal mogelijk te besteden. Door lokaal te adverteren op Sittard-Geleen Nieuws tegen een concurrerende prijs! Neem contact op met Paul Storms via de telefoon: 06-22543972 of via de mail: [email protected].
De nieuwsredactie is te bereiken via [email protected].
