Van Kul pès Kultuur: Waat ei waer

Óndanks mien “zomerreces” toch nog ein gaetje gevónje om deze van KUL pès KULTUUR te sjrieve. Ich kèn ’t neit laote.

Waat ei waer. Dat waar mien eesjte gedanke vanmörge en ’t góng mer neit oet miene kop. Waat ein waer, ein leidje van Sjra Puts, geer kènt ’t waal.

Este ’t einmaol in de kop höbs, bèste ’t neit zo mer kwiet. En ’t geit gaaroets neit euver dit tropies waer! Ouch neit euver die tropiese raegesjoele die veer lèts gehad höbbe. Veer zoute doe in de Geusselt en keke nao de musical van de Bokkeriejers. Geweldig óm te zeen en te heure, ondanks dat veer ein sjoel van drie kerteier op ós krege. Gelökkig hawwe de meiste luuj eine raegejas bie zich. Óndanks ’t waer waar ’t ein fantastiese show. Mit prech-tige zengesj en toneelspelesj. Vónj ‘t sjus zo sjoon es ’t Gelök van Limburg.

Ich zoug de lètste Pinkpop-gengesj hun kóffesj, nae (wiekend-) tesje, biejein zètte oppet terras van ’t hotel. Ze wachde opein om same nao de sjtase te loupe. Die zulle blie zeen dat ze in ein kuil kamer gesjlaope höbbe nao die drie hittegolfdaag in Landgraaf, dach ich. Tja, wae zich ein duur passepartout kènt permeteiere… grepke.😉 De eesjte en lètste maol dat ich bie Pinkpop waar in Gelaen, kosde mien vrunj en mich dat gaaroets niks, want veer ware ónger de draod gekraope óm bènne te kómme! ’t Is noe verjaord.

Waal sjiek dat ze dit jaor ein “Hoogmès van ’t Zuiden” höbbe gehawte en dat väöl festivalgengesj dao ouch van genaote höbbe! Ich ouch (oppe pc).

’t Waar get väöl fees dit weekend; al die gesjlaagde, ’t WK voetbal en alle BBQ’s bie naobere. In plaatsj van de zeemis of zeevlam hóng bie ós reigelmaotig eine bbq-mis. ’t Wurt toch tied veur eine sjriftelikke cursus bbq-we. Wilt emes dem in de diverse wiekblaedjes zètte?? 😉

Genóg kul veur noe. Ich sjloet aaf mit: blief gezóndj, drènk väöl water, zuik de sjeem op en hawt uch röstig.

Pès de volgende van KUL pès KULTUUR.

Mit de kómplimènte, John. Reageiere: [email protected].

Adverteren op Sittard-Geleen.nieuws.nl? De bezoekersaantallen blijven stijgen, wat onder andere goed is voor de zichtbaarheid van onze adverteerders. Wil jij je naamsbekendheid vergroten?

Wij denken graag met je mee om de reclame-euro zo optimaal mogelijk te besteden. Door lokaal te adverteren op Sittard-Geleen Nieuws tegen een concurrerende prijs! Neem contact op met Paul Storms via de telefoon: 06-22543972 of via de mail: [email protected].

De nieuwsredactie is te bereiken via [email protected].