In crisistied gebaore es ein ideeke óm toch nog get Vastelaovessjtömming ónger de luuj te brènge mer óngertössje in mènnige hoeskamer al neit meer weg te dènke: Radio Nónnevot.
Op Vastelaoveszóndig 14 fibberwari prizzenteiert Radio Nónnevot ein sjoon pregram mit de Top111 van de bèste Zittesje Vastelaovesleidjes.
Tom Jessen zal vanoet de Optochhal eine ach oer doerende marathon aan plaetjes veur uch dreeje. Dat kènt geer, naeve oppe radio, ouch op FaceBook en YouTube live volge es geer wilt. Ooze raozende reporter Sam Verbeek maak inmiddels al opnames bie bekènde en awt bekènde Zitterder die dan te heure zeen en ènkele gaste kómme coronaproof nao de hal óm hun anekdotes te vertèlle.
Sjtöm veur zóndig 7 fibberwari via www.radiononnevot.nl. Maak hie op eure eige perseunlikke top vief kènbaar. Oet alle reacties volg dan es van zellef de eesjte Top111 van ’t Zittesje vastelaovesrepertoire. Inmiddels zeen d’r al meer es 350 sjtömme oetgebrach!
En es ’t dan Essjelegounsdig is dan kiek veer wieër. Ómdat veer Radio Nónnevot d’r gaer veur uch alleney in wille hawte.
Dus wo’t geer dees daag ouch zeet in opmarsj nao oos Vastelaovesdaag die gans angesj oet zulle zeen, vuil uch dan mit jederein verbónje middels al dae sjone meziek dae Zitterd in al die jaore biejein haet gebrach.
Gank nao radiononnevot.nl en download de app. Hang de verseiering op, haol Zittesje nónnevotte in hoes, ein pilske of jónge klaore en laot de Vastelaovend tot eur verbeelding sjpraeke middels de tone die Zitterd nog kènt!
Waat einmaol d’r in zit, geit d’r nootsj meer oet!
Vastelaovend same!
Radio Nónnevot
